தரமில்லாத சத்துணவு வழங்கப்பட்டதால் சத்துணவு பணியாளர் இடமாற்றம்

உடுமலை: உடுமலை ஊராட்சி ஒன்றிய துவக்கப் பள்ளியில், தரமில்லாத சத்துணவு வழங்கப்பட்டதால், சத்துணவு பணியாளர் இடமாற்றம் செய்யப்பட்டார்.


திருப்பூர் மாவட்டம், உடுமலை, மலையாண்டிபட்டினம் ஊராட்சி ஒன்றிய துவக்கப் பள்ளியில், 88 மாணவர்களுக்கு சத்துணவு வழங்கப்படுகிறது. தரமில்லாத சத்துணவு வழங்கப்பட்டதால், சில குழந்தைகளுக்கு உடல் நலம் பாதிக்கப்பட்டதாக கூறி, பெற்றோர், நேற்று பள்ளியை முற்றுகையிட்டனர்.

ஆய்வு

தலைமையாசிரியர் ராமகிருஷ்ணன் கொடுத்த தகவலின் பேரில், உடுமலை பி.டி.ஓ., பழனிவேல் மற்றும் சத்துணவு திட்ட அலுவலர் சாதிக்பாட்சா ஆகியோர் சத்துணவு பொருட்களை பார்வையிட்டனர். அதில், சுண்டல், பருப்பு உள்ளிட்ட பொருட்கள் வண்டுகள் துளைத்து, தரமில்லாமல் இருப்பது கண்டறியப்பட்டது.

இதுகுறித்து, பி.டி.ஓ., பழனிவேல் கூறியதாவது: சத்துணவுக்கான பொருட்களை வாங்கும்போது, சத்துணவு பணியாளர்கள் மற்றும் பள்ளி நிர்வாகத்தினர் கவனமாக வாங்க வேண்டும். பொருட்கள், தரமில்லாமல் இருப்பதை அறிந்தால், உடனடியாக சம்பந்தப்பட்ட அதிகாரிகளுக்கு தெரிவித்து, தரமான பொருட்களை பெற்று உணவு தயாரிக்க வேண்டும்.

பணியிட மாற்றம்
தற்போது வழங்கப்பட்ட தரமற்ற பொருட்களுக்கு மாற்றாக, வேறு பொருட்கள் வழங்கப்படும். இது தொடர்பாக, சத்துணவு அமைப்பாளர் சாந்தி இடமாற்றம் செய்யப்பட்டுள்ளார். மீண்டும் இதுபோன்று அலட்சியமாக செயல்பட்டால், கடும் நடவடிக்கை எடுக்கப்படும். இவ்வாறு அவர் தெரிவித்தார்.