எஸ்.எம்.எஸ்., மின் கட்டண விவரம் : மின் வாரிய இணையதளத்தில் பதிவு

எஸ்.எம்.எஸ்., மூலம், மின் கட்டண விவரங்களை பெறுவதற்கு, மின் வாரிய இணைய தளத்தில், மொபைல் எண்ணை பதிவு செய்யும் வசதியை, மின் வாரியம் துவக்கியுள்ளது. தமிழகத்தில், 2.44 கோடி மின் நுகர்வோர் உள்ளனர். இதில், விவசாயம், 20 லட்சம்; குடிசை, 10 லட்சம் இணைப்புகள் உள்ளன. மின் பயன்பாடு கணக்கு எடுக்கப்பட்டதில் இருந்து, 20 நாட்களுக்குள், மின் கட்டணம் செலுத்த வேண்டும். 

மின் வாரிய ஊழியர்கள், வீடு, நிறுவனங்களுக்கு, மின் பயன்பாடு குறித்து கணக்கெடுக்க செல்லும் போது, பலர் இருப்பதில்லை. இதனால், மின் நுகர்வோர், குறித்த காலத்திற்குள், மின் கட்டணத்தை செலுத்த தவறி விடுகின்றனர். இதையடுத்து, எஸ்.எம்.எஸ்., மூலம் மின் பயன்பாடு, கட்டணம், பணம் செலுத்த வேண்டிய கடைசி தேதி ஆகிய விவரங்களை, நுகர்வோருக்கு தெரியப்படுத்த, மின் வாரிய அதிகாரிகள் முடிவு செய்துள்ளனர்.

இதற்காக, மின் வாரிய பிரிவு அலுவலகங்களில், நுகர்வோரிடம் இருந்து, மொபைல் எண் பெறப்பட்டு வருகிறது. இலவச மின் இணைப்பு பெற்றுள்ள குடிசை, விவசாயிகளுக்கு, இந்த சேவை இல்லை என, தெரிகிறது. எஸ்.எம்.எஸ்., சேவை கேட்டு, நேற்று வரை, 2 கோடி மின் நுகர்வோர், மொபைல் எண்ணை பதிவு செய்துள்ளனர். எஞ்சியுள்ளவர்களும், விரைவாக மொபைல் எண்ணை பதிவு செய்ய வசதியாக, மின் வாரிய இணையதளத்தில், பிரத்யேக வசதி துவங்கப்பட்டுள்ளது.

அதன்படி,

Tangedco இணையதளத்திற்கு செல்ல வேண்டும்
Billing services என்ற பகுதியை,"கிளிக்' செய்ய வேண்டும்
அதில், "Mobile Number Registration' என்ற இடத்தில், மின் நுகர்வோர் எண் மற்றும் மொபைல் எண் பதிவு செய்ய வேண்டும். இந்த சேவை திட்டம், ஜூன், முதல் வாரத்தில் அறிமுகம் செய்யப்பட உள்ளது.


அதிகம் படித்தவர்களுக்கு அக்கறை இல்லை! : எஸ்.எம்.எஸ்., சேவை கேட்டு, கிராமங்களில் வசிப்போர் கூட, ஆர்வமுடன் மொபைல் எண்ணை பதிவு செய்து வருகின்றனர். ஆனால், அதிகம் படித்தவர்கள் உள்ள, அடையாறு, தாம்பரம், போரூர், கிண்டி உள்ளிட்ட பகுதிகளை உள்ளடக்கிய, சென்னை தெற்கு மாவட்டத்தில், ஒரு சிலரே இதுவரை பதிவு செய்துள்ளதாக தெரிகிறது.