இடமாறுதல் கலந்தாய்வு எப்போது? அதிருப்தியில் ஆசிரியர்கள் - தினமலர்

தமிழகத்தில், அனைத்து ஆசிரியர்களுக்கான இடமாறுதல் குறித்த கலந்தாய்வு தகவல்கள், இதுவரை வெளியிடப்படாததால், ஆசிரியர்கள் மத்தியில் கடும் அதிருப்தி நிலவுகிறது.ஒவ்வொரு, ஆண்டும் மே இறுதியில் தொடக்க, நடுநிலை, உயர் மற்றும் மேல்நிலைப்பள்ளிகளில் பணிபுரியும் அனைத்து ஆசிரியர்களுக்கு, பொது இடமாறுதல் கலந்தாய்வு நடத்தப்பட்டு, ஜூனில் பள்ளிகள் திறக்கும்போது புதிய பள்ளிகளில் பணியமர்த்தப்படுவது வழக்கம்.

மாநில அளவில், அதிக எண்ணிக்கையில் கலந்தாய்வில் பங்கேற்கும் அரசு ஊழியர்களை கொண்ட துறை பள்ளிக்கல்வித்துறை. ஒவ்வொரு ஆண்டும்,
10 ஆயிரம் ஆசிரியர்கள் இடமாறுதல் பெறுகின்றனர். மே இறுதியில் நடக்க வேண்டிய கலந்தாய்வுக்கு, பள்ளிக்கல்வித்துறை விண்ணப்பங்களை இதுவரை வினியோகிக்கவில்லை என்று புகார் எழுந்துள்ளது.

தேர்தல் பணிகளை காரணம் காட்டி, கலந்தாய்வுக்கு எவ்வித முயற்சிகளும் மேற்கொள்ளாமல், மெத்தனமாக கல்வி அதிகாரிகள் செயல்படுவதாக ஆசிரியர்கள் புகார் தெரிவித்துள்ளனர்.

ஒவ்வொரு ஆண்டும், கலந்தாய்வில் இடங்களை மறைத்தல், அரசியல் தலையீடு, நிர்வாக மாறுதல் என்ற பெயரில் பல்வேறு முறைகேடுகள் நடந்து வருகின்றன. தற்போது தேர்தல் என்ற காரணம் காட்டி கலந்தாய்வை தாமதப்படுத்துவதால், முறைகேடுகள் மேலும் அதிகரிக்க வாய்ப்பு உள்ளது.
இது தவிர, ஜூன், ஜூலை மாதங்களில் கலந்தாய்வு நடத்துவதால், இடமாறுதல் பெறும் ஆசிரியர்களின் குழந்தைகளை பள்ளியில் சேர்ப்பதும், குடியிருப்பு வசதிகளை ஏற்படுத்துவதும், மிகுந்த சிரமமாக உள்ளது.

தமிழ்நாடு உயர்நிலை மற்றும் மேல்நிலைப்பள்ளி தலைமையாசிரியர்கள் சங்க மாநில பொது செயலாளர் சாமி சத்தியமூர்த்தி கூறுகையில், ''வழக்கமாக, ஏப்ரல் 10ல் கலந்தாய்வு விண்ணப்பங்கள் வினியோகிக்கப்படும். ஆனால், இந்தாண்டு இதுவரை எந்த தகவல்களும் அறிவிக்கப்படவில்லை. பள்ளிக்கல்வித்துறை அதிகாரிகள், உடனடியாக காலிபணியிடங்களை வெளியிட்டு, ஒளிவுமறைவு இல்லாத கலந்தாய்வை மே இறுதிக்குள் நடத்தவேண்டும்,'' என்றார்.